Një atmosferë magjike mbushi Pallatin e Kulturës në Strugë gjatë edicionit të 12-të të Festivalit të Këngës për Fëmijë – “Peshku i Artë”. Plot 20 fëmijë nga Shqipëria, Maqedonia e Veriut, Kosova dhe Mali i Zi u ngjitën në skenë për të ndarë emocionet e tyre artistike, duke sjellë një mbrëmje të paharrueshme për publikun. Ky festival i veçantë nuk ka për qëllim vetëm garën mes talenteve të reja, por mbi të gjitha ofron një përvojë të pasur në zhvillimin artistik, emocional dhe shoqëror të fëmijëve. Në këtë frymë, fituesit e vërtetë të këtij edicioni ishin vetë fëmijët pjesëmarrës, sepse pjesëmarrja në një skenë kaq profesionale dhe të bukur përfaqëson një triumf në vetvete. Pas këtij suksesi qëndron puna dhe përkushtimi i jashtëzakonshëm i organizatores Fitore Istrefi Alushi. Me dashurinë e saj të pakushtëzuar për fëmijët dhe profesionalizëm të lartë, ajo arriti të ndërtojë një ngjarje ku çdo detaj ishte menduar me kujdes, duke e kthyer “Peshkun e Artë” në një histori suksesi të vërtetë.
Një rol kyç në këtë festival pati edhe juria profesionale, e cila garantoi një vlerësim të drejtë dhe të ndjeshëm për çdo performancë. Ajo përbëhej nga figura të njohura të artit dhe kulturës shqiptare: Albana Cufaj-Zhuta – poete dhe artiste e mirënjohur, Zulqifli Ziba – pedagog i muzikës në Universitetin Shtetëror të Tetovës, Avni Qahili – gazetar dhe tekstshkrues i njohur në skenën muzikore shqiptare.
