Drejtori ekzekutiv i OpenAI, Sam Altman, thotë se publiku duhet të ketë më shumë besim te kompanitë e inteligjencës artificiale për të vepruar në mënyrë të përgjegjshme, edhe pse shqetësimet për rreziqet e kësaj teknologjie janë në rritje.
Megjithatë, drejtuesi i OpenAI pranoi se frika e publikut ndaj inteligjencës artificiale është e justifikuar, duke theksuar se aftësitë e teknologjisë janë zhvilluar me ritme shumë të shpejta.
“Nuk kërkon më aq shumë imagjinatë sa më parë të mendojmë se si kjo mund të shkojë keq. Mendoj se bota ka të drejtë të ketë frikë”, tha Altman.
Deklaratat e tij vijnë në një kohë kur industria e AI po përballet me një debat të shtuar mbi sigurinë dhe nevojën për rregullim. Altman foli publikisht për herë të parë që prej një postimi viral të një ish-kërkuesi të kompanisë Anthropic, i cili paralajmëroi se inteligjenca artificiale mund të përbëjë një kërcënim ekstrem për njerëzimin deri në fund të dekadës, nëse zhvillohet pa kufizime.
Disa drejtues dhe ekspertë të industrisë shprehën mbështetje për këtë paralajmërim, ndërsa drejtori ekzekutiv i Anthropic, Dario Amodei, bëri thirrje për ngadalësimin e ritmit të zhvillimit të AI dhe për ndërhyrje rregullatore nga qeveritë.
Altman, bashkëthemeluesi i Google DeepMind Demis Hassabis dhe Elon Musk ishin ndër figurat që e mbështetën publikisht paralajmërimin.
Altman: Kompanitë mund të vetërregullohen
Në konferencë, Altman deklaroi se kompanitë e inteligjencës artificiale janë në gjendje të vendosin vetë standarde për sigurinë e teknologjisë.
“Jam shumë i bindur për aftësinë e kompanisë sonë dhe të industrisë për ta bërë këtë në mënyrë të sigurt”, tha ai.
Sipas Altman, siguria dhe përputhja e sistemeve me interesat njerëzore duhet të ecin përpara aftësive të reja të AI. Ai shtoi se nëse kompanitë nuk janë në gjendje ta garantojnë këtë, duhet të ngadalësojnë zhvillimin ose edhe ta ndalojnë atë.
Qëndrimin për vetërregullimin e industrisë e mbështeti edhe drejtuesi i Meta-s, Mark Zuckerberg, i cili argumentoi se laboratorët e AI kanë si aftësinë, ashtu edhe interesin për të zhvilluar sisteme më të sigurta.
Edhe drejtori ekzekutiv i Nvidia-s, Jensen Huang, tha se kompanitë duhet të kenë përgjegjësinë kryesore për të vendosur nëse një version i ri i teknologjisë është gati për t’u publikuar.
“Nuk kemi nevojë për ligje apo rregullore të reja”, deklaroi Huang, duke shtuar se siguria është mbi të gjitha një çështje inxhinierike.
Jo të gjithë janë dakord me vetërregullimin
Ideja që kompanitë e AI të mbikëqyrin vetë zhvillimin e teknologjisë është kundërshtuar nga disa figura të industrisë.
Jack Clark, bashkëthemelues dhe drejtues në Anthropic, deklaroi për BBC se një industri “tërësisht e parregulluar” do të nënkuptonte marrjen e rreziqeve shumë të mëdha.
Ndërkohë, Patrick Hillman, drejtues i kompanisë Logical Intelligence, vuri në pikëpyetje nivelin e besimit të publikut te kompanitë teknologjike dhe kërkoi që firmat e AI të tregojnë konkretisht se çfarë janë të gatshme të ndalojnë së bëri nëse besojnë se produktet e tyre paraqesin rrezik.
Kompanitë diskutojnë standarde të përbashkëta sigurie
Mes debatit për rregullimin, drejtuesit e OpenAI dhe Anthropic kanë deklaruar se po punojnë për një marrëveshje më të gjerë në industri mbi standardet e sigurisë.
Dario Amodei tha se Anthropic është tashmë në bisedime me kompani të tjera për vendosjen e standardeve dhe kontrolleve më të forta për zhvillimin dhe përdorimin e AI.
Nga ana tjetër, drejtuesi i OpenAI, Chris Lehane, ka deklaruar se kompania po bashkëpunon me laboratorë të tjerë, përfshirë Anthropic dhe Google DeepMind, për të zhvilluar standarde vullnetare për teknologjitë më të avancuara të inteligjencës artificiale.
Debati për sigurinë e AI po zhvillohet paralelisht me zgjerimin e shpejtë të përdorimit të kësaj teknologjie në ekonomi, biznes dhe jetën e përditshme.
