Struga, qyteti i kulturës, liqenit dhe harmonisë ndëretnike, për të pestin vit me radhë bëhet mikpritëse e artistëve dhe artdashësve nga e gjithë hapësira shqiptare, në kuadër të festivalit tashmë tradicional Struga Fest. Ky edicion jubilar vjen më i fuqishëm se kurrë, duke sjellë në një natë të vetme art, emocione dhe krenari.
Në skenën e “Struga Fest 2025” do të ngjiten emra të mëdhenj të muzikës shqiptare, ndër ta diva Inva Mula, pianisti i mirënjohur Genc Tukiqi dhe kori “Okarina” nga Prishtina, të cilët do të dhurojnë një mbrëmje të paharrueshme për publikun strugan.
Me një mikpritje të rrallë dhe dashamirësi të veçantë, festivali i këtij viti pritet të jetë një nga më të suksesshmit. Artistët do të ndajnë me publikun artin e tyre, ndërsa Struga do të dëshmojë edhe një herë rolin e saj si epiqendër kulturore në Maqedoninë e Veriut.
Organizatorët theksojnë se ky festival nuk është vetëm një ngjarje muzikore, por një përpjekje e përkushtuar për të ruajtur dhe promovuar vlerat kulturore, artistike dhe shpirtin e bashkimit përmes artit.
“Struga Fest” është dëshmi se kur ka dashuri dhe vullnet, krijohen tradita që jetojnë gjatë.”
