Manifestimi “Ftesë për Lexim” shënoi edicionin e radhës, duke u bërë një ngjarje e rëndësishme në kalendarin kulturor të Shkupit, ku morën pjesë poetë dhe shkrimtarë të njohur nga Shkupi dhe trojet mbarëshqiptare. Aktiviteti, që fokusohet në promovimin e leximit dhe vlerësimin e fjalës së shkruar, u bë një festë e dijes dhe kulturës. Kryetarja e Shoqatës për Përparimin dhe Zhvillimin e Kulturës “Porta Skupi” në Shkup, Arlinda Kalisi, theksoi rëndësinë e këtij manifestimi: “ Kjo ngjarje është një mundësi e shkëlqyer për të mbështetur dhe promovuar kulturën dhe letërsinë në qytetin tonë. Ne, si shoqatë jemi të angazhuar për të krijuar mundësi që nxisin zhvillimin e kulturës dhe dijes, duke sjellë së bashku autorë, poetë dashamirës të librave. Ky manifestim është një mundësi për të bashkuar të gjithë ne që ndajmë dashurinë për letërsinë, poezinë dhe dijen. Le të kujtojmë se leximi është themeli i mendimit kritik, një urë mes brezave dhe një burim i pashtershëm frymëzimi. “ Ftesë për lexim” është një hap tjetër përpara në përpjekjet tona për të inkurajuar leximin dhe krijimin e një shoqërië që vlerëson rëndësinë e fjalës së shkruar”.
Sot, ne jemi mbledhur për të festuar fuqinë e fjalës së shkruar dhe për të inkurajuar leximin si një akt të dijes dhe një mënyrë jetese, që na çon përtej përditshmërisë dhe na lidh me botën. Ky aktivitet është më shumë se një ngjarje kulturore – është një thirrje për të ruajtur dashurinë për librin dhe kulturën-tha kryetarja e Porta Skupit, Arlinda Kalisi.
Ky aktivitet u organizua me qëllimin e inkurajimit të pasionit për letërsinë dhe poezinë, duke ofruar një platformë për shkrimtarët dhe poetët të ndajnë krijimtarinë e tyre me një audiencë të gjerë. Gjatë mbrëmjes, disa nga emrat më të njohur të letërsisë shqipe, si Merita Abazi dhe Adem Abdullau, lexuan poezi të zgjedhura, duke sjellë në jetë vargje të mbushura me emocion dhe kuptim për audiencën. Në mesin e të ftuarve ishin emra si Bajramali Selimi, poet i njohur për poezitë e tij të thella dhe emocionuese, si dhe Mejreme Kajolli Tusha, një poeteshë që njihet për ndjeshmërinë dhe thellësinë e mendimit në vargjet e saj. Gjithashtu, morën pjesë edhe poetë e shkrimtarë të tjerë të njohur, si Mimoza Mustafaji Jonuzi, e cila është një autore e dalluar për prozën dhe poezinë e saj. Ndër ta mund të përmendim gjithashtu Ibadet Livareka, Alejna Islmai, Blerta Tmava Veselaj, Anda Islami, Emine Islami Zejnullau, Nurije Neziri, Agona Çupi, Selvete Kelmendi, Xhejda Tusha, dhe të tjerë si dhe studentë dhe dashamirës të poezisë që i dhanë ngjarjes ngjyrën dhe energjinë e tyre. Manifestimi dhe poezitë u shoqëruan me performancat e kitaristit Driton Sulejmani.
Dje në suaza të manifestimit në fjalë u mbajt edhe një tryezë e rrumbullakët, ku autorë dhe studiues nga Kosova dhe Shqipëria diskutuan tema bashkëkohore që e tangojnë letërsinë në përgjithësi, dhe letërsinë shqipe në veçanti. Performancat ishin të larmishme dhe frymëzuese.Po ashtu, ngjarja ofroi mundësi edhe për shkrimtarët e rinj, të cilët patën mundësinë të shfaqin krijimtarinë e tyre të freskët dhe origjinale. Po ashtu, ngjarja ofroi mundësi edhe për shkrimtarët e rinj, të cilët patën mundësinë të shfaqin krijimtarinë e tyre të freskët dhe origjinale.
Gjatë ditës së nesërme do të vizitohen disa nga monumentet kulturore të Shkupit, me ç’rast përmbyllet manifestimi për këtë vit. “Ftesë për Lexim” është vetëm një nga shumë aktivitete që Shoqata “Porta Skupi” ka planifikuar për këtë vit. Ata janë të angazhuar të vazhdojnë të mbështesin dhe promovojnë aktivitetet kulturore që nxisin zhvillimin e dijes dhe kulturës, duke u ofruar mundësi krijuese të gjithë atyre që janë të pasionuar pas fjalës së shkruar dhe artit të letërsisë. Manifestimi u përkrah finaciarisht nga Ministria e Kulturës dhe e Turizmit e Republikës së Maqedonisë së Veriut.
