Avokati shqiptar Spartak Ngjela ka reaguar ashpër ndaj deklaratës së presidentit serb Aleksandër Vuçiq, i cili në një intervistë për radiotelevizionin publik serb ka thënë se Serbia mund të bëhet anëtare e Bashkimit Evropian para vitit 2030, por pa e njohur pavarësinë e Kosovës.
Vuçiq deklaroi:
“Unë besoj se ekzistojnë shanse që Serbia të bëhet pjesë e BE-së para vitit 2030. Por ekziston një çështje tjetër, çështja e Kosovës. Unë nuk mund dhe nuk do ta pranoj pavarësinë e Kosovës.”
Në lidhje me këtë qëndrim, Ngjela e ka cilësuar deklaratën e Vuçiqit si të paarsyeshme dhe absurde.
Sipas tij, presidenti serb po sillet në mënyrë irracionale, duke bërë deklarata që nxisin tensione në rajon.
Ngjela tha për “Bota Sot”:
> “Nuk mund t’i diskutosh me një arsye normale ato rrjedhje mendore që konstatohen vijimisht te Vuçiq.
Ai është një kryeministër që përditë thotë: ‘Do të marr Kosovën’, edhe pse e di që në Kosovë ka trupa nga NATO.
Dhe këtu mbyllet çdo diskutim për marrëzinë e Vuçiqit.”
Deklarata e Vuçiqit vjen në një kohë kur dialogu Kosovë–Serbi, i ndërmjetësuar nga Bashkimi Evropian, ndodhet në ngërç të thellë. Brukseli ka theksuar se normalizimi i marrëdhënieve me Kosovën është kusht i domosdoshëm për përparimin e Serbisë drejt integrimit evropian.
Megjithatë, Vuçiq vazhdon të ecë në vijën e hollë mes Lindjes dhe Perëndimit – duke ruajtur marrëdhënie të ngushta me Moskën dhe Pekinin, ndërsa publikisht deklaron se synon anëtarësimin në BE.
