Një marsh protestues u mbajt sot në Shkup, në mbështetje të ish-presidentit të Kosovës, Hashim Thaçit, si dhe tre ish-udhëheqësve të tjerë të Ushtrisë Çlirimtare të Kosovës (UÇK) – Jakup Krasniqit, Rexhep Selimit dhe Kadri Veselit, të cilët u shpallën fajtorë për krime lufte dhe u dënuan nga Dhomat e Specializuara të Kosovës në Hagë.
Tubimi u mbajt te monumenti i Skënderbeut, ndërsa qytetarët mbanin pankarta me mbishkrimet „Liri“ dhe „Drejtësi“. Në mesin e të pranishmëve ishin edhe kryetari i BDI-së, Ali Ahmeti, si dhe kryetari i Aleancës për Shqiptarët, Ziadin Sela.
Këshilli organizativ i protestës njoftoi se në tubim ishin ftuar familjet e dëshmorëve, veteranët dhe invalidët e luftës, ish-të burgosurit dhe të përndjekurit politikë, si dhe përfaqësues të sektorit fetar, akademik dhe civil.
Më 16 shtator, Hashim Thaçi dhe Jakup Krasniqi u dënuan me nga 25 vjet burgim, Kadri Veseli me 18 vjet, ndërsa Rexhep Selimi me 13 vjet burgim.
Trupi gjykues i shpalli të katër fajtorë për krimet e luftës të ndalimit të paligjshëm ose arbitrar, trajtimit mizor, torturës dhe vrasjes, ndërsa i shpalli të pafajshëm për akuzat për krime kundër njerëzimit.
Aktgjykimi është i shkallës së parë dhe mund të apelohet.
