Ministri i Sportit, Borko Ristovski së bashku me kryetarin e Komunës së Tearcës, Daut Memishi, sot e kanë lëshuar në përdorim qendrën sportive plotësisht të rindërtuar në fshatin Dobroshtë, informojnë nga Ministria.
Në kuadër të kompkeksit sportiv është ndërtuar: fushë e futbollit, fushë basketbolli me dysheme polipropileni dhe një kënd lojërash për fëmijë të pajisur me pajisje të përshtatshme.
“Me këtë investim infrastrukturor nga Ministria e Sportit, banorët e Dobroshtes dhe vendbanimeve përreth dhe veçanërisht të rinjtë, kanë marrë një hapësirë moderne, të sigurt dhe funksionale për sport dhe rekreacion. Qëllimi dhe angazhimi ynë është të sigurojmë kushte për sport dhe një jetë të shëndetshme në çdo komunë, sepse sporti duhet të jetë i arritshëm për të gjithë. Ne vazhdojmë të zbatojmë projekte që promovojnë sportin dhe përmirësojnë infrastrukturën në të gjithë vendin”, tha ministri Ristovski.
Ky projekt është pjesë e programit të Ministrisë së Sportit për ndërtimin dhe rindërtimin e infrastrukturës sportive dhe shpërndarjes së barabartë të investimeve në mbarë vendin.
