Më 18 nëntor, duke filluar nga ora 20:00, në skenën e Operas dhe Baletit Nacional -Shkup, do të shfaqet baleti me dy akte “Madam Bovari”, i frymëzuar nga romani i njohur i Gustave Flaubert. Vepra eksploron luftën e brendshme të personazhit kryesor, Ema Bovari, midis dëshirës për pasion dhe liri, dhe kufizimeve të normave shoqërore, një temë që mbetet e aktuale edhe sot.
Koreografia është realizuar nga Viktor Ishçuk nga Ukraina, ndërsa dirigjenti i shfaqjes është Eduard Ambarcumjan nga Armenia. Muzika përbëhet nga krijimet e Kamij Sen-Sans, Moris Ravel, Zhil Masne, Feliks Mendelson dhe Georg Fridrih Hendl, me skenografi dhe kostumografi nga Andrej Zlobin dhe Gana Ipatieva. Dizajni i ndriçimit është nga Milço Alexandrov, koncert mjeshtri Kliment Todoroski, pianisti Andreja Naunov, dhe menaxheri i projektit Kiro Pavlov.
Rolin e Ema Bovari do ta interpretojë prima balerina Maria Kiçevska Shokarovska, ndërsa rolin e Sharl Bovari do ta luajë Françisko Himenez Ruiz, dhe Balazh Loçei në rolin e Rudolf Bulanzhe. Performanca përfshin edhe solistët, ansamblin e baletit dhe orkestrën e Operas dhe Baletit Nacional.
“Madam Bovari” sjell në skenë psikologjinë komplekse të personazhit kryesor përmes baletit, muzikës dhe artit skenik, duke krijuar një përvojë vizuale dhe emocionale të pashembullt. Çdo skenë është e dizajnuar për të nxjerrë në pah thellësinë emocionale dhe interpretimin bashkëkohor të historisë klasike.
