Me krenari të veçantë përshëndes miratimin e Ligjit të ri për Energjetikë nga Kuvendi i Republikës së Maqedonisë së Veriut. Ky ligj modern dhe gjithëpërfshirës vendos shtetin tonë në hartën energjetike të Evropës, duke siguruar harmonizim të plotë me Paketën e Katërt Energjetike të Bashkimit Evropian dhe detyrimet tona ndaj Komunitetit Evropian Energjetik.
Përfitimet kryesore për MEPSO-n dhe sistemin transmetues janë:
Vendosja e një kornize të qartë rregullatore dhe plan vjetor për investime, të cilat krijojnë parashikueshmëri për realizimin e projekteve kapitale dhe rrisin sigurinë e investitorëve në kapacitete të reja transmetimi.
Futja e mundësisë për ruajtjen e energjisë elektrike dhe implementimi i sistemeve të matjes inteligjente, duke krijuar kushte për menaxhim fleksibël të rrjetit, integrim më të madh të burimeve të ripërtëritshme dhe balancim më efikas të sistemit.
Vendosja e standardeve të përforcuara për sigurinë kibernetike dhe mbrojtjen e të dhënave, që do të rrisin nivelin e sigurisë operative dhe besimin e përdoruesve dhe pjesëmarrësve në treg.
Mundësimi i bashkimit rajonal tregtar dhe krijimi i rregullave transparente për kapacitetet ndërkufitare, duke i mundësuar MEPSO-s të forcojë rolin e saj në treg dhe të përmirësojë likuiditetin e tregjeve me energji balancuese.
Ky ligj krijon mekanizma të qëndrueshmërisë energjetike afatgjatë, promovon digjitalizimin dhe përshpejton tranzicionin drejt energjisë së gjelbër.
Ekipi ynë mbetet plotësisht i përkushtuar për modernizimin e rrjetit të transmetimit, duke siguruar furnizim të sigurt, efikas dhe të qëndrueshëm për të gjithë qytetarët dhe ekonominë tonë.
