Gjykata e Posaçme e Shkallës së Parë kundër Korrupsionit dhe Krimit të Organizuar (GJKKO) vendosi sot të mos e ndryshojë masën e sigurisë ndaj Ilir Metës,duke e lënë atë në “arrest në burg”.
Gjykatësi i Posaçëm Erjon Çela ka vendosur që ish-presidenti i Shqipërisë dhe lideri aktual i Partisë së Lirisë në opozitë të mbetet në paraburgim në burgun “313” në Tiranë.
Meta kërkoi të lirohej nga burgu me argumentin se “nuk ka më rrezik nga falsifikimi i provave”, sepse hetimet kundër tij janë mbyllur dhe çështja është dërguar në gjyq.
Kërkesa e tij erdhi pasi, më datën 5 të këtij muaji, Prokuroria e Posaçme Kundër Korrupsionit dhe Krimit të Organizuar (SPAK) e njoftoi zyrtarisht Ilir Metën për mbylljen e hetimeve dhe transferimin e çështjes në gjykatë.
Meta akuzohet për korrupsion, larje parash dhe fshehje të pronave, për çështje që lidhen me dosjen për lobimin e partisë së tij në SHBA dhe aferën CEZ-DIA.
Ai u arrestua më 21 tetor 2024 dhe që atëherë ndodhet në paraburgim. Akuzat i quajti politike, duke pretenduar se për to nuk ka fakte penale.
Meta (56) ishte president i Shqipërisë nga viti 2017 deri në vitin 2022, një pozicion që e mori nga pozicioni i kryetarit të parlamentit. Ai më parë ishte gjithashtu ministër i ekonomisë, punëve të brendshme dhe të jashtme.
