Platforma e rrjeteve sociale X përjetoi valë ndërprerjesh me 10 mars, të cilat pronari dhe drejtori i përgjithshëm miliarder Elon Musk i atribuoi një “sulmi kibernetik masiv” të lidhur me adresa IP që buronin nga Ukraina.
“Nuk jemi ende të sigurt se çfarë ndodhi saktësisht, por pati një sulm kibernetik masiv për të rrëzuar ekosistemin me adresa IP që vinin nga zona e Ukrainës,” tha Musk për Fox Business.
Musk pretendoi në një postim në X se sulmi u krye “me shumë burime.”
Ekspertët e sigurisë kibernetike kanë shprehur skepticizëm mbi pretendimet e Musk-ut. Sulmet e këtij lloji, të njohura si sulme të mohimit të shërbimit (DDoS), mund të kryhen nga grupe të vogla ose hakerë individualë. Sulmet DDoS dërgojnë trafik të tepërt drejt një faqeje interneti për të mbingarkuar serverët e saj, duke shkaktuar shpesh ndërprerje të shërbimit.
Një burim i industrisë, duke folur në kushte anonimiteti, i tha Reuters se pjesa më e madhe e trafikut që kishte si objektiv X mund të gjurmohej deri te adresa IP nga SHBA-ja, Vietnami, Brazili dhe vende të tjera.
Trafiku nga Ukraina ishte “i papërfillshëm,” tha burimi.
Po atë ditë kur ndodhi sulmi i pretenduar kibernetik, Musk e quajti senatorin amerikan Mark Kelly një “tradhtar” për ndarjen e detajeve nga vizita e tij në Ukrainën e goditur nga lufta. Në rolin e tij si kreu i Departamentit për Efikasitetin Qeveritar (DOGE), i krijuar nga presidenti amerikan Donald Trump, Musk ka udhëhequr shkurtimet e ndihmës humanitare për Kievin dhe ka kërkuar mbylljen e mediave të financuara nga SHBA në Ukrainë.
Këto media janë një shpërdorim i “parave të taksapaguesve” dhe përgjegjëse për “djegien” e deri në një miliard dollarëve nga fondet amerikane, tha Musk.
Musk është aktualisht njeriu më i pasur në botë.
