Shqipëria hyn sot në ditën e 45-të të protestave qytetare, ndërsa organizatorët kanë deklaruar se tubimet do të vijojnë pavarësisht temperaturave të larta dhe sezonit turistik.
Edhe këtë mbrëmje, protestuesit pritet të mblidhen para Kryeministrisë, ku do të kërkojnë dorëheqjen e kryeministrit Edi Rama dhe ndryshime në sistemin politik.
Protesta, e cila nisi fillimisht si reagim ndaj projektit në Zvërnec, sipas organizatorëve është shndërruar në një lëvizje më të gjerë kundër qeverisë dhe klasës politike.
Gjatë 44 ditëve të mëparshme, qytetarët kanë zhvilluar marshime në bulevardin “Dëshmorët e Kombit”, duke mbajtur pankarta dhe duke përcjellë mesazhe kundër qeverisë.
Në tubimin e fundit, organizatorët deklaruan se rezistenca do të vazhdojë gjatë gjithë verës dhe se protestat do të vijojnë deri në muajin shtator. Ata u kanë bërë thirrje qytetarëve dhe diasporës që të vazhdojnë pjesëmarrjen.
Gjatë protestës së 44-të u dëgjuan thirrje politike dhe kërkesa për ndryshim, ndërsa në podium folën aktivistë, përfaqësues të diasporës dhe qytetarë.
Organizatorët kanë theksuar se synimi i tyre është rritja e presionit publik ndaj qeverisë dhe vazhdimi i protestave pa ndërprerje.
Me nisjen e ditës së 45-të, qytetarët pritet të rikthehen sërish para Kryeministrisë, duke vijuar një nga ciklet më të gjata të protestave të zhvilluara në vend vitet e fundit.
