Dauti: Operacioni “Filter” zbuloi shmangie të detyrimeve prej mbi 6 milionë eurosh
Drejtoria e Doganave ka paraqitur kallëzime penale kundër 18 personave fizikë dhe tri kompanive. Sipas të dhënave të hetimit, detyrimet e papaguara ndaj shtetit tejkalojnë 377 milionë denarë.
Zëvendësdrejtori i Drejtorisë së Doganave, Mustafa Dauti, njoftoi se në kuadër të operacionit “Filter” është zbuluar një skemë e dyshuar e kontrabandës së cigareve, në të cilën dyshohet se janë përfshirë kompani, persona fizikë, si dhe zyrtarë policorë e doganorë.
Hetimi përfshin shtatë raste gjatë periudhës janar–qershor 2024. Sipas Drejtorisë së Doganave, në këto raste janë futur ilegalisht në qarkullim gjithsej 69.350.000 cigare, ndërsa detyrimet e shmangura ndaj shtetit vlerësohen në mbi 377 milionë denarë, ose mbi 6 milionë euro.
Në tri raste, kamionët me cigare kanë hyrë në vend përmes pikës kufitare Bogorodicë në procedurë tranziti. Cigaret dyshohet se janë shkarkuar në territorin e Maqedonisë së Veriut, ndërsa kamionët kanë dalë bosh përmes Tabanocit. Në sistemin doganor, megjithatë, dalja e tyre është regjistruar sikur ende transportonin cigaret.
Në katër rastet e tjera, hyrja e kamionëve me cigare përmes Bogorodicës nuk është evidentuar nga zyrtarët policorë dhe doganorë. Sipas hetimit, cigaret janë shkarkuar pa dokumentacionin dhe procedurat e nevojshme doganore.
Më 23 shtator 2026, Drejtoria e Doganave ka paraqitur kallëzime penale kundër tri kompanive dhe 18 personave fizikë, mes tyre tre zyrtarë policorë dhe katër zyrtarë doganorë. Të nesërmen janë kryer kontrolle në 23 lokacione, në koordinim me Prokurorinë për Ndjekjen e Krimit të Organizuar dhe Korrupsionit dhe me asistencën e MPB-së.
Deri tani janë arrestuar 13 persona: katër zyrtarë doganorë, dy zyrtarë policorë, dy shoferë dhe pesë persona të tjerë. Hetimi vazhdon, ndërsa Drejtoria e Doganave paralajmëron se numri i personave të përfshirë dhe i kallëzimeve penale mund të rritet.
