Irani ka mohuar deklaratën e zëvendës presidentit amerikan, JD Vance se kishte rënë dakord të lejonte inspektorët bërthamorë të ktheheshin në vend, disa orë pas përfundimit të raundit të parë të bisedimeve midis Uashingtonit dhe Teheranit, të cilat synojnë të arrijnë një marrëveshje gjithëpërfshirëse mes tyre.
Pas negociatave të mbajtura në Zvicër, Vance i përshkroi bisedimet si “një bazë shumë të mirë” dhe argumentoi se kontaktet me Agjencinë Ndërkombëtare të Energjisë Atomike (IAEA) mund të fillonin menjëherë.
Megjithatë, Ministria e Jashtme iraniane mohoi se ishte marrë ndonjë angazhim i ri në lidhje me inspektimet bërthamore. Zëdhënësi i ministrisë, Esmaeil Baghaei, i tha agjencisë shtetërore të lajmeve Irna se Teherani nuk kishte rënë dakord për asgjë përtej procedurave ekzistuese.
“Teherani nuk ka ndërmend të lejojë inspektorët e Agjencisë Ndërkombëtare të Energjisë Atomike (IAEA) të vizitojnë vendet bërthamore të bombarduara gjatë luftës”, tha ai.
