Me lule dhe slogane kundër dhunës, pabarazisë dhe diskriminimit, miliona gra në mbarë botën demonstruan për Ditën Ndërkombëtare të Gruas. Nga Athina në Madrid, Paris, Mynih, Cyrih dhe Beograd dhe në shumë qytete të tjera anembanë kontinentit, gratë morën pjesë në mitingje duke kërkuar t’i jepej fund trajtimit të tyre si qytetare të dorës së dytë në shoqëri, politikë, familje dhe punë.
Në Madrid, protestuesit mbanin pankarta të pikturuara me dorë që përshkruanin Gisele Pélicot, e cila është bërë një simbol për gratë në të gjithë Evropën në luftën kundër dhunës seksuale.
Në Stamboll, qindra gra dëgjuan fjalime, kërcyen dhe kënduan nën diellin e pranverës. Protesta plot ngjyra u mbajt nën mbikëqyrjen e policëve të armatosur të cilët kishin në dispozicion topa uji nga frika e trazirave.
Në Berlin, presidenti gjerman Frank-Walter Steinmeier bëri thirrje për përpjekje më të forta për të arritur barazinë dhe paralajmëroi për tendencën për të kthyer progresin që tashmë është bërë. Në Amerikën e Jugut, disa nga marshimet u organizuan nga grupe që protestonin kundër vrasjeve të grave.
Qindra gra në Ekuador marshuan nëpër rrugë duke mbajtur pankarta kundër dhunës dhe “sistemit patriarkal”.
