Para 31 vitesh, më 3 tetor 1995, u krye atentat ndaj presidentit të parë të Republikës së pavarur të Maqedonisë, Kiro Gligorov. Ai e mbijetoi sulmin me lëndime të rënda në kokë, ndërsa në shpërthim humbi jetën shoferi i tij, Aleksandar Spirovski, ndërsa u plagos truproja Ilço Teovski.
Si pasojë e plagëve, ndërroi jetë edhe kalimtari i rastësishëm Hristo Hristomanov, ndërsa u plagosën edhe Klime Korobar dhe Jovan Atanasovski.
Atentati ndodhi në orën 09:50 në rrugën “Maqedonia” në Shkup, para hotelit “Bristol”. Gligorov, me automjetin zyrtar, po udhëtonte nga rezidenca e tij drejt Kuvendit.
Sulmi u krye me një automjet-bombë. Në një “Citroën Ami 8” ishin vendosur 20 kilogramë eksploziv, i cili u aktivizua me telekomandë në momentin kur automjeti i presidentit po kalonte drejt ndërtesës së Kuvendit. Pak para shpërthimit, automjeti zyrtar i presidentit ishte ngadalësuar nga një automjet “Fiço”.
Hetimi konstatoi se atentati ishte përgatitur dhe organizuar mirë, por edhe më shumë se tri dekada më vonë mbetet e panjohur se kush qëndronte pas sulmit. Procedura hetimore ndaj një autori të panjohur ende është e hapur.
Në kuadër të hetimit janë kontrolluar 30.850 automjete, janë kontrolluar më shumë se 15.000 objekte dhe janë identifikuar mbi 188.000 persona, nga të cilët 19.000 janë kontrolluar. Ministria e Punëve të Brendshme ka zhvilluar edhe një sërë bisedash informative me persona për të cilët kishte dyshime se mund të ishin të lidhur me atentatin, por të gjithë janë liruar pas marrjes në pyetje.
Kiro Gligorov ndërroi jetë më 1 janar 2012, në moshën 94-vjeçare.
Atentati ndaj tij edhe sot mbetet një nga rastet më të mëdha të pazbardhura në historinë e re të Maqedonisë.
