Irani i ka paraqitur Shteteve të Bashkuara një plan shtatëditor për rihapjen e Ngushticës së Hormuzit dhe rifillimin e negociatave mes dy vendeve, ka deklaruar ministri i Jashtëm iranian, Abbas Araghchi.
Duke folur për gazetarët në margjinat e Asamblesë së Përgjithshme të Kombeve të Bashkuara, Araghchi tha se propozimi i është përcjellë Uashingtonit përmes një ndërmjetësi.
“Ne i paraqitëm një plan Shteteve të Bashkuara përmes ndërmjetësve. Nëse plotësohen kushte të caktuara, Ngushtica e Hormuzit do të hapet në fund të ditës së shtatë dhe bisedimet do të fillojnë përsëri”, tha ai.
Ministri iranian nuk bëri publike të gjitha kushtet e planit, por deklaroi se ato nuk shkonin përtej çështjeve për të cilat, sipas tij, dy vendet kishin rënë dakord në qershor.
Sipas mediave amerikane, propozimi i Teheranit është marrë nga pala amerikane përmes një ndërmjetësi. Një zyrtar i Shtëpisë së Bardhë i tha CNN se SHBA-ja po zhvillon “bisedime pozitive dhe konstruktive përmes ndërmjetësve”.
Përfaqësues amerikanë dhe iranianë zhvilluan të martën bisedime në margjinat e Asamblesë së Përgjithshme të OKB-së, në atë që raportohet të jetë kontakti i parë i drejtpërdrejtë i këtij niveli mes dy palëve pas disa muajsh.
Ndërkohë, mediat iraniane raportuan se Teherani ka paraqitur edhe kërkesa konkrete për rihapjen e Ngushticës së Hormuzit. Mes tyre përmenden heqja e menjëhershme e bllokadës detare amerikane ndaj bregdetit iranian, lirimi i aseteve iraniane të ngrira dhe përfundimi i luftimeve në të gjitha frontet.
Ngushtica e Hormuzit është një nga rrugët kryesore të transportit të energjisë në botë dhe çdo kufizim i lëvizjes së anijeve në këtë zonë mund të ketë pasoja të rëndësishme për tregjet ndërkombëtare të naftës dhe gazit.
