Çmimet e naftës bien ndjeshëm pas sinjaleve për uljen e tensioneve mes Iranit dhe SHBA-së
Nafta u lirua me rreth 5 për qind pas sinjaleve për armëpushim mes Iranit dhe SHBA-së
Çmimet e naftës shënuan rënie të ndjeshme pasi Irani sinjalizoi se do t’i ndërpresë sulmet, nëse Shtetet e Bashkuara të Amerikës vazhdojnë pauzën në operacionet ushtarake. Kjo rriti pritjet për uljen e tensioneve në Lindjen e Mesme.
Kontratat e së ardhmes për naftën ndërkombëtare referente “Brent”, me dorëzim në shtator, ranë me rreth pesë për qind dhe, në një moment, u tregtuan me çmim prej rreth 92 dollarësh për fuçi. Edhe nafta amerikane WTI humbi rreth pesë për qind të vlerës, duke u tregtuar me rreth 85 dollarë për fuçi. Çmimet vazhduan të luhaten gjatë tregtimit.
Rënia vjen pas gati dy javësh tensionesh të shtuara, të cilat më herët e çuan çmimin e naftës “Brent” drejt 100 dollarëve për fuçi dhe shkaktuan shqetësime për furnizimin dhe transportin e energjisë nëpër rajon.
Sipas Reuters, një përfaqësues i lartë iranian ka deklaruar se Teherani është i gatshëm t’i ndërpresë operacionet e tij, për sa kohë që Uashingtoni nuk i vazhdon sulmet. Qëndrimi i Iranit ishte se do t’i përgjigjej çdo sulmi, por nëse sulmet ndalen, do të ndalen edhe operacionet iraniane.
Administrata amerikane, nga ana tjetër, e paraqiti pauzën si një mundësi për vazhdimin e përpjekjeve diplomatike për uljen e tensioneve.
Qetësimi i situatës u reflektua menjëherë në tregjet energjetike, pasi investitorët vlerësuan se është zvogëluar rreziku i menjëhershëm për ndërprerje të mëtejshme të furnizimit me naftë.
Megjithatë, pasiguria rreth transportit vazhdon. Qarkullimi i anijeve nëpër Ngushticën e Hormuzit, një nga rrugët më të rëndësishme të tregtisë botërore të naftës, vazhdon të mbetet dukshëm nën nivelin e zakonshëm, ndërsa normalizimi i plotë mund të zhvillohet gradualisht.
Çmimet më të ulëta të naftës sollën lehtësim edhe në tregjet më të gjera financiare, pasi u zvogëluan shqetësimet se rritja e çmimeve të energjisë do ta nxiste më tej inflacionin dhe do t’i detyronte bankat qendrore t’i mbanin më gjatë normat e larta të interesit.
