Presidenti ukrainas, Volodymyr Zelensky, e ka cilësuar si të rëndësishëm vendimin e Departamentit të Shtetit të SHBA-së për të autorizuar Ukrainën të blejë 500 interceptorë për sistemet kundërraketore Patriot. Megjithatë, ai ka paralajmëruar se dërgesat mund të nisin vetëm pas disa vitesh, ndërsa vendi përballet me sulme të vazhdueshme ruse ndaj infrastrukturës energjetike dhe po i afrohet dimrit.
Në një deklaratë të cituar nga agjencia ukrainase e lajmeve Ukrinform, Zelensky u bëri thirrje partnerëve ndërkombëtarë të gjejnë një zgjidhje për nevojat e menjëhershme të Ukrainës, pa pritur realizimin e kontratave të reja të furnizimit. Sipas presidentit ukrainas, vetëm gjatë dy javëve të fundit të tetorit janë regjistruar më shumë se 30 sulme ruse ndaj komponentëve kritikë të rrjetit energjetik. Ai tha se Moska ka intensifikuar goditjet ndaj shërbimeve jetike, si energjia elektrike, ngrohja, furnizimi me ujë dhe infrastruktura që garanton funksionimin e qyteteve dhe komuniteteve.
Zelensky theksoi se Ukraina u ka kërkuar Shteteve të Bashkuara një paketë të posaçme mbështetjeje për dimrin, e cila të përfshijë dërgimin e 100 interceptorëve Patriot në muaj. “Pesëqind raketa do të ishin të mjaftueshme për të mbrojtur qiellin tonë për muajt e ardhshëm, pikërisht në një kohë kur është thelbësore që Ukraina të mbajë një pozicion të fortë në negociata dhe të parandalojë Rusinë të shkatërrojë jetën në qytetet dhe komunitetet ukrainase”, deklaroi ai. Kreu i shtetit ukrainas argumentoi se SHBA-ja, vendet evropiane dhe partnerët e tjerë kanë rezerva të mjaftueshme të interceptorëve PAC-3, të cilët mund t’i vihen menjëherë në dispozicion Ukrainës. Sipas tij, rezervat e vendeve partnere mund të plotësohen më vonë, përmes prodhimit të kontraktuar dhe financuar tashmë nga Ukraina dhe aleatët e saj.
“Dhënia e tyre menjëherë Ukrainës dhe më pas rimbushja e arsenaleve të partnerëve tanë në vitet në vijim do të ishte qasja e duhur. Është një zgjidhje absolutisht e realizueshme”, u shpreh Zelensky. Pavarësisht mirënjohjes ndaj presidentit amerikan Donald Trump, Departamentit të Shtetit dhe administratës amerikane për autorizimin e blerjes, Zelensky nënvizoi se nevojat e Ukrainës janë të menjëhershme. “Ne po kërkojmë vendime që mund të garantojnë mbrojtjen e jetëve njerëzore jo pasnesër apo në një datë të mëvonshme, por në momentin kur kërcënimi shfaqet: kur Rusia vret dhe shkatërron”, përfundoi presidenti ukrainas.
