Ka dalë nga shtypi libri më i ri me poezi i Daim Miftarit, “Ditë pa qiell”, një vëllim që i kushtohet njeriut të zakonshëm dhe betejave të tij të heshtura. Në faqet e këtij libri, poezia lind nga rutina, puna, familja, kujtesa, mungesa dhe përpjekja për të ruajtur një zë të brendshëm në një botë që kërkon vazhdimisht të na bëjë të ngjashëm me njëri-tjetrin.
Me një ligjërim të përmbajtur dhe imazhe të fuqishme, autori ndërton një univers poetik ku përditshmëria shndërrohet në reflektim, ndërsa detajet më të vogla marrin peshë ekzistenciale. Libri është i organizuar në disa cikle poetike, të cilat lëvizin mes jetës urbane, kujtesës së fëmijërisë, vendlindjes, dashurisë familjare dhe kërkimit të identitetit. Në qendër të tij mbetet njeriu që përpiqet të mos humbasë veten në ritmin e jetës së përditshme. Daim Miftari është poet dhe përkthyes letrar nga Gostivari.
Ai është autor i disa librave me poezi, ndërsa krijimtaria e tij është përkthyer në disa gjuhë dhe është botuar në revista dhe antologji letrare brenda dhe jashtë vendit.
