Ish ministrja e Jashtme, njëherësh deputete e Partisë Socialiste, Elisa Spiropali i është përgjigjur kryeministrit Edi Rama pas përplasjes në mbledhjen e Grupit Parlamentar dhe debatit të shkaktuar nga qëndrimet e saj publike, si edhe mungesa në seancën për imunitetin e Belinda Ballukut.
Në një reagim të gjatë, ajo thekson se kritikat e brendshme nuk duhet të kthehen në ndëshkim publik dhe se paralajmërimet politike nuk duhet të shërbejnë si presion ndaj mendimit ndryshe.
Ajo adreson paralajmërimin e kryeministrit Edi Rama se do të përjashtohet nga Grupi Parlamentar, ndërsa thotë se nëse qëndrimet e saj për mënyrën se si funksionin partia dhe qeveria konsiderohet arsye për përjashtim, atëherë le ta bëjë dhe ta largojë nga grupi socialist.
Ish-ministrja duket se ka shkelur vijën e kuqe të partisë me kritikat e ashpra publike përmes disa postimeve në mediat sociale, kufij që kryeministri Rama ia bëri të qartë në mbledhjen e kësaj të hënë të grupit socialist dhe ministrave. Krisja e parë e madhe ndodhi kur Spiropali theu urdhrin e partisë dhe nuk mori pjesë në votimin për imunitetin e Belinda Ballukut.
“Herën e parë nuk erdhe në votim, herën e dytë bëre çarçafin. Herë të tretë nuk ka, del jashtë këtij grupi. Je akoma këtu, sepse nuk dua që PS të humbasë investimin që ka bërë, por merr frymë thellë dhe kupto atë që ke bërë”, i ka thënë Rama.
Kjo është përplasja e dytë publike e Spiropalit me kryeministrin, që kur ajo u la jashtë kabinetit qeveritar. Në një mbledhje të ngjashme një muaj më parë, Rama e paralajmëroi se do ta nxirrte jashtë Spiropalin, pas polemikave të saj me Ministren e Shtetit Erjona Ismaili.
Qëndrimet e ashpra publike të Spiropalit e kanë irrituar tej mase kryeministrin Rama, i cili ka qenë i prerë që në fillim.
“Tek puna e partisë nuk mund të bëni drama, e kam me ty Elisa! Nuk dua të krijoni situata në parti. Partia ka dy ngjyra, bardhë e zi. Ose me ne, ose përballë nesh”, i është drejtuar ai.
Spiropali ka kërkuar fjalën për të sqaruar pozicionin e saj, por nuk është lejuar të flasë nga kryeministri Rama i cili ka thënë se kjo është replika e tij për ato që ish-ministrja ka shkruar në rrjetet sociale.
Pas shkarkimit nga posti i ministres së Jashtme, Spiropali, dikur një nga bashkëpunëtoret më të ngushta të Ramës, ka hedhur një lumë akuzash ndaj partisë së saj por dhe mënyrës se si po qeveriset vendi. Ajo ka folur deri për struktura dhe institucione që nuk i binden më ligjit, por klaneve dhe interesave personale.
Mbledhja që zgjati për 4 orë në Pallatin e Brigadave nisi me fokus tek raportimi i Kryenegociatores Majlinda Dhuka dhe Ministrit të Jashtëm për procesin e integrimit europian, por përfundoi me situatën më të diskutuar brenda PS-së, përplasjen Rama-Spiropali.
REAGIMI I PLOTE:
Më përjashto!
Debatet e brendshme, sado të forta, nuk duhet të shndrrohen në spektakël ndëshkimor publik.
Nëse kjo ndodh, problemi nuk është më mospajtimi, është frika nga mospajtimi.
Ky fakt kokëfort, ky konstatim i dukshëm, më tepër se vetë paralajmërimi, më detyron të flas.
Kur paralajmërimi publik bëhet instrument kërcënimi, heshtja nuk është më maturi, është dorëzim.
Nëse qëndrimi im për mënyrën si po funksionon partia, qeveria, shteti, konsiderohet arsye për përjashtim, atëherë po e them qetë dhe qartë: Më përjashto.
Jo si sfidë personale. Jo si dramë politike. Jo si show mediatik. Por si provë se problemi nuk është te fjala që ngre shqetësim, por te sistemi që shqetësimin nuk e duron.
Nuk kam sulmuar Partisë Socialiste. Kam kritikuar modelin që në disa aspekte po dëmton edhe Partinë Socialiste.
Kam folur për ndarjen e partisë nga shteti. Për rrezikun që politika të zëvendësohet nga administrimi. Për një logjikë kontrolli. Ku struktura burokratike dhe pushteti administrativ rrezikojnë të marrin vendin e përfaqësimit politik.
Nëse këto konsiderohen arsye për përjashtim, atëherë pyetja nuk është pse flas unë. Pyetja është pse këto gjëra nuk lejohen të thuhen.
Pushteti nuk dobësohet nga kritika. Pushteti dobësohet kur humb aftësinë për vetëkorrigjim.
Nëse në një forcë politike që ka lindur si projekt emancipimi kombëtar, kritika trajtohet si devijim, atëherë problemi është më i thellë se çdo debat. Është krizë kulture politike.
Nëse të kërkosh që institucionet të mos kontrollohen, personalizohen, instrumentalizohen, është faj, atëherë më përjashto.
Nëse të kërkosh garë e meritë, brenda e jashtë partisë është faj, më përjashto.
Nëse të kërkosh që socialistët të mos zëvendësohen nga një model “drejtorokracie”, ku kontributi politik zbehet përballë kontrollit administrativ, qenka mungesë disipline, më përjashto.
Nëse të mendosh se pushteti duhet të njohë vetkufizim, dhe nuk duhet të njësohet me strukturat që e rrethojnë, qenka herezi e papranueshme, më përjashto.
Nuk po mbroj një pozicion. Aq më pak një kolltuk. Kryetarllëkun dhe ministërllëkun nuk ma ka lënë gjyshi apo gjyshja. Po mbroj një parim.
Në politikë mospajtimi nuk është thyerje e besnikërisë.
Mospajtimi është forma më e lartë e besnikërisë.
Kur refuzimi për t’u bërë pjesë e një automatizmi votash në Parlament interpretohet si largim nga grupi, atëherë problemi nuk është disiplina, por ideja se bindja kërkohet e verbër, pa arsyetim, pa marrë parasysh pasojat.
Kur refuzohet bindja si ritual, nuk po mbrohet uniteti, por po kërkohet nënshtrim.
Kur ndërgjegjja trajtohet si shkelje disipline vetëm sepse nuk dakordësohet me automatizmin e veprimeve, atëherë problemi nuk është mospajtimi, por modeli që e ngatërron bindjen me nënshtrimin, duke tentuar të normalizojë deri edhe abuzimin. Nëse edhe këtë e kam gabim, më përjashto.
Por të paktën të bëhet e qartë se përjashtimi nuk po ndodh sepse dikush ka tradhtuar partinë. Po ndodh sepse dikush ka refuzuar të heshtë për mënyrën si po vepron pushteti në emër tësaj.
Dhe kjo nuk është çështje personale. Është çështje se si kuptohet politika. Çfarë ndodh me një parti kur qoftë edhe një akt politik mosvotimi shihet si armiqësi? Çfarë ndodh me një shtet kur kundërshtimi trajtohet si kërcënim? Çfarë ndodh me një shoqëri kur bindja kërkohet si nënshtrim?
Këto nuk janë pyetje për fatin tim, të cilin e bëj vetë pa ndihmën e askujt. Janë pyetje për mënyrën si qeveriset.
Kërcënimi për përjashtim nga grupi më shqetëson më pak se ideja se mund të normalizohet mendimi që një grupim politik duhet të funksionojë përmes frikës.
Një formacion politik ku askush nuk kundërshton, nuk është i fortë. Është i heshtur dhe duhet ruajtur nga zgripi.
Heshtja politike ka qenë gjithmonë paralajmërim i së keqes.
Jo rrallë, nuk tremb forca reale e kundërshtarit.
Tremb jehona që i bëhet frikës.
Shumë struktura kontrolli mbahen jo aq nga forca e tyre, sa nga përfytyrimi i rrejshëm që të tjerët kanë për forcën e tyre, për mekanizma që mbijetojnë nga frika që prodhojnë. Nëse nuk dakordësohemi as për kaq, më përjashto.
Nëse nuk respektohet e drejta të flas, madje dhe të bërtas, kur familja ime politike fillon të ketë frikë nga fjala, nuk ka dilemë, zgjidhja është 1, më përjashto.
