ChatGPT do të fillojë të përfshijë reklama pranë përgjigjeve për përdoruesit në Shtetet e Bashkuara, teksa OpenAI kërkon burime të reja të ardhurash.
Kompania njoftoi të premten se testimi i reklamave do të nisë fillimisht vetëm për përdoruesit amerikanë, pas spekulimeve në rritje se firma me seli në San Francisko do të adoptonte një model të ri të gjenerimit të fluksit të parasë, përveç abonimeve ekzistuese.
Reklamat pritet të shfaqen në javët në vijim dhe do të vendosen mbi ose nën përgjigjet e ChatGPT, por jo brenda tyre. Sipas materialeve demonstrative të publikuara nga kompania, reklamat do të paraqiten në një kuti me ngjyrë të zbutur. Ato do t’u shërbehen përdoruesve të rritur “kur ka një produkt ose shërbim të sponsorizuar të përshtatshëm, bazuar në bisedën tuaj aktuale”, thuhet në njoftimin e OpenAI.
Reklamat nuk do t’u shfaqen përdoruesve nën 18 vjeç dhe nuk do të shoqërojnë përgjigje që lidhen me tema të ndjeshme, si shëndeti, shëndeti mendor apo politika. Po ashtu, përdoruesit do të kenë mundësinë të klikojnë për të mësuar pse u është shfaqur një reklamë e caktuar.
Më herët, drejtori ekzekutiv i OpenAI, Sam Altman, kishte shprehur hezitim ndaj futjes së reklamave në chatbot. “Në njëfarë mënyre i urrej reklamat, si zgjedhje estetike”, ishte shprehur ai. Kompania e tij ka marrë angazhime për të shpenzuar më shumë se 1 trilion dollarë në infrastrukturën mbështetëse të inteligjencës artificiale në vitet e ardhshme. Altman ka deklaruar se të ardhurat vjetore tashmë tejkalojnë 13 miliardë dollarë.
“Ndoshta mund të ketë reklama jashtë rrjedhës së modelit të madh gjuhësor që të jenë ende shumë të mira, por barra e provës do të duhej të ishte shumë e lartë”, tha Altman së fundmi. “Duhet të jenë vërtet të dobishme për përdoruesit dhe shumë e qartë që nuk ndërhyjnë në rezultatet e modelit. Do të ishte shumë e vështirë dhe do të duhej shumë kujdes për ta bërë siç duhet. Njerëzit kanë një nivel shumë të lartë besimi te ChatGPT.”
Në një postim në blog të publikuar të premten, OpenAI u përpoq të harmonizojë qëndrimin kritik të Altmanit ndaj reklamave me nevojën për të ardhura.
“Bizneset tona të ndërmarrjeve dhe abonimeve janë tashmë të forta, dhe ne besojmë në një model të larmishëm të ardhurash, ku reklamat mund të luajnë një rol në bërjen e inteligjencës më të aksesueshme për të gjithë”, thuhet në postim. Kompania njoftoi gjithashtu lançimin e ChatGPT Go, një paketë abonimi me kosto të ulët, me çmim 8 dollarë në muaj.
